Elî Rabe Weha Nabe

Elî rabe weha nabê,
Bi hîl û pîla çênabê,
Umir borî, mirin ha bê,
çira tedbîrekê nakî?

Ev e umrê te çil sal e,
Te ne milk e, ne pertal e,
Xwelî l’ser te qebir mal e,
De ka tê kengê peyda kî?

Heval çû ne, tu paş ma yî,
Dikin gazî: “çi ra nayî?”
Dibêjim tu nezana yî,
Ji lew guhdariyê nakî.

Tu zanî ko tu rêdûr î,
Gelo ma qey tu yê kor î?
Heçî hat û ji te borî,
Tu ranabî, lezê nakî.

De ka rabe, tu bes raze!
Xwe pêk bîne gelek taze,
Li pêş te kaş û efraz e,
Ji vê razanê şerm nakî?